讀書2
講開今日考試, 早兩日我已在家拚命做. Equation 難不了我, 很多年前我已知自己係算死草的人, 驅驅 costing 算係咩, 家課有一題計來計去入住率都over 300 %. 咪玩啦,! 即係講一間用來開房既酒店一日 room occupancy全滿之餘仲超過兩對狗男女去開房姐, 就算九龍塘最頂盛時年代都無咁好生意啦 !!
用左兩個鐘都計唔掂, 放棄, 聽日抄人算了 !!
第二日一早返學校, 我後悔了, 全部早返的, 都來抄我功課, 仲要我解釋, 然後再側疑我用的方法 ( 佢老味丫, 咁唔順就咪q 抄啦 ), 我淨係講解都無時間去溫考試既野, 算 ! 都係少事, 有個阿姐拍台拍chair地唔同意我講既方法 (仲有d 口水噴向我塊面到), 果陣我忍聲告氣, 慢慢地同佢講, 我果條都係抄後面既同學的, 呢招聲東擊西果然有效, 後面的, 已經比佢煩左半個鐘仲向到駁…..
差不多考試時間, 老師向我面前飄過, 我立即把握機會捉實他, 問佢有咩可能一間住宅入住率超過 300 %? 佢比既題目同現實有太大距離了, 老師面色變黑 ! (果陣我都有d 驚佢會秋後算帳的), 佢目無表情冷靜的說 “ 比我諗一諗…”, 我比佢當時既氣勢嚇了一嚇, 死死地氣坐返個位準備考試……….
考完試, 我都係不死心, 話哂都用左兩個鐘向呢題到, 低聲下氣同老師講 (果陣全班人走哂),
“我份功課已經交左, 唔會有可能再做過, 果題用左好多時間去做都唔make sense, 希望你可以話我知, 點樣做得個答案合情理 d”
阿sir 佢低頭沉思一會答 “ 我向個sales revenue 到寫多了一個零, 係我個錯, 全班無可能做岩的…..”,
我啞口無言, 心裡有很多粗口想衝出來, 而且我還自作一條 equation 出來答題目………..
回應(6) | 回應的RSS | 暫時未有引用通告| 
(1)
kickin8
2007 十一月 10 at 11:11 pm hahahaha........maybe your instructor purposely tricked you guys.... =X
2007 十一月 11 at 9:59 am 除了bear一聲外，還只是可以bear一聲，這個老師真係玩嘢...
2007 十一月 11 at 10:21 pm 若然是我...係唔會做的，不過，都會問阿sir原因既...嘿...你呢條確實係超低b的題目。
2007 十一月 12 at 3:23 pm kickn + 小汀,
真係bear 一聲的, 呢個秘密暫時都係得我知, 下個星期我會同同學講, 要留意佢地既表情, 睇下有無啞口無言, 心裡有很多粗口想衝出來先 ! XD
小白,
你咁勁既 ! 題目內容我都無寫, 你就知係超低B題目來既 ! XD
2007 十一月 16 at 3:09 pm 為何你的讀書史以咁有趣. . .= =
2007 十一月 17 at 2:50 pm 銀月,
每一天也有不同的事發生, 在乎是你如何演繹...
我所寫的東西都可以發生任何人身上, 關鍵在你以甚麼角度去看事件吧.
例如: 有一天, 我行路pk 了, 腳磨損流血, 路人沒有多理會, 只有一個好心太太扶我起身, 我也估不得得太多, 慢慢的一跛一跛行回公司..
其他事主會如何在文字上形容當時情況呢?
有些人絕口不提, 認為太瘀, 也有些人認為, 只不過是一件大不了事情, 所以不說
相對來說, 亦有人覺得是很悲慘一件事, 可能說出,
"我在街上跌傷, 身邊親眼目睹的人都沒有理會, 只扮看不見, 直來直往, 我腳流血如泉, 很痛又站不起來, 孤單無助, 社會上的人是這樣冷漠嗎 ? 差不多要哭出來時, 只有一位好心的太太經過, 見義勇為, 一手扶起我, 細心問候我有沒有任務損傷, 但我也顧不了, 忙說沒問題, 事實上明明腳痛不欲生, 亦忍著, 一跛一跛趕回公司開會.” 寫成咁, 會似我嗎 ??
如果是我寫呢 (我的真人真事來的)
果日無拉拉行行下街向前仆, 成個人大字形仆左向行人路上, 隻腳痛到唔郁得, 又爬唔向起身 路人甲乙丙丁只係行過啤一啤然後一支箭向前走, 好似唸緊咒語 “你睇我唔到, 我睇你唔到咁”, 頂佢丫, 話哂人家一條女pk 得咁應, 係人類都幫下手啦 !! 跟住有一隻強壯而有力的手伸過來, 我就十分期待的望一望伸出同情之手時何方英雄, 說不定就是一段難能可貴姻緣來了 ! 我望到的原來是一個愛心滿爆既師奶扶我起身, 某程度上是好失望的, 不過算了, 有人扶好過沒有人扶, 師奶好好心地, 係咁問我洗唔洗 call 白車?. 因心情已冷了一半, 忙說不用了, 仆下仆的行回公司, 如趕不回去開會, 老闆會斬我九碌…